پرتورہلیہ نے غالب شناسی کے لیے جو مشکل اور دشوار گزار راستہ اختیار کیا ہے اوراُس میں وہ جس سلامت روی سے گامزن ہیں،اُس کی کوئی دوسری مثال موجود نہیں ہے۔ ایک ایسے دور میں جب ہماری علمی، ادبی اور مجلسی زندگی سے فارسی کا برائے نام تعلق بھی باقی نہیں رہا، غالب کے فارسی خطوں سے استفادہ کرنا تو کیا، ان خطوں کو جزوی طور پر سمجھنا بھی کارمحال ہے،پرتوروہیلہ نے فارسی خطوط غالب کے کئی مجموعوں(نامہ ہائے فارسی،مآثر غالب، باغِ درود) کو پے درپے اردو میں منتقل کرکے غالب اور پرستار غالب کے درمیان اجنبیت کی فضا کم کرنے کی کامیاب کوشش کی ہے۔ اس سلسلے کی تازہ ترین کڑی”پنج آہنگ“میں شامل خطوط کا زیر نظر ترجمہ ہے۔ اس ترجمے کے ذریعے اردو والوں کو پہلی مرتبہ اُس فضا میں سانس لینے کا موقع ملے گا جوغالب نے ان خطوں کوفارسی میں لکھتے ہوئے تخلیق کی تھی۔ پرتوروہیلہ فارسی زبان پر ماہرانہ دسترس رکھنے کے ساتھ ساتھ غالب کے مزاج دان بھی ہیں،اسی لیے انھوں نے انشائے غالب کو منشائے غالب کے مطابق اس طرح اردو میں منتقل کیا ہے کہ ترجمے پر تخلیق کا گماں ہوتاہے۔