مرزا ظفر الحسن صاحب نے جن سے محبت کی ہے ان میں فیض کے علاوہ مخدوم،غالب لائبریری اور حیدرآباد دکن بھی شامل ہیں۔یہ مرزا صاحب کی چار کمزوریاں یاان کی شخصیت کے عناصر اربعہ۔۔۔ مرزا صاحب کی محبت کایہ عالم ہےکہ وہ فیض کے خلاف کوئی بات سن نہیں سکتے  اور اگر کہیں  فیض کی تعریف ہورہی ہوتواس طرح خوش ہوتے ہیں جیسے خود ان کی تعریف ہورہی ہو۔۔۔۔ مخدوم کی باتیں کرتے ہوئے مرزا صاحب پر عجیب کیفیت طاری ہوجاتی ہے۔ان کے چہرے پر چمک سی آجاتی ہے۔۔۔۔۔ جس محبت اور خلوص  سے غالب لائبریری کو بنایا ہے اس کی  کوئی دوسری مثال کم از کم ہمارے ملک میں موجود نہیں ہے۔ اورپھر سب سے بڑی بات یہ ہے کہ یہ لائبریری کراچی کا سب سے بڑا ادبی اور تہذیبی مرکز بن گئی ہے۔۔۔۔  حیدرآباد دکن کی محبت تو مرزا صاحب کی زندگی کا سب سے بڑا سرمایہ ہے۔سقوط حیدرآباد کے بعدبے شمار حیدرآبادی پاکستان آئے ۔یہ سب لٹ لٹا کر خالی ہاتھ آئے لیکن مرزا صاحب واحد حیدرآبادی ہیں جوخالی ہاتھ نہیں آئے۔ یہ پورے حیدرآباد ہی کو اپنے ساتھ لے آئے۔ وہ اب بھی حیدرآباد ہی میں رہتے ہیں اور اسی کی معطر فضاؤں میں سانس لیتے ہیں۔