ترجمہ طبع زاد تحریر سے زیادہ مشکل کام ہے۔ ترجمے کے لیے ضروری ہے کہ وہ نہ صرف لفظی ہو بلکہ جس زبان میں کیا جارہاہے اُس کے روزمرہ محاورہ کے عین مطابق بھی ہو اور آپ اسے ا س طرح پڑھ سکیں جیسے مصنف نے اسے ترجمے کی زبان میں لکھا تھا۔

          پرتوروہیلہ کو فارسی زبان پر عبور حاصل ہے اوراپنے علم ووجدان کے طفیل غالب کے اندازِفکر اورطرز احساس کوگرفت میں لانے پرقدرت بھی رکھتے ہیں۔ یہی وجہ ہے کہ غالب کی استعارتی فارسی نثر کو انہوں نے اس طرح اردو کاجامہ پہنایا ہے گویا غالب نے یہ مکاتیب اردو ہی میں لکھے تھے ۔یقیناً یہ پہاڑ جیسا کام تھا جسے انھوں نے بے حد محنت اورانتہائی سلیقے سے انجام دیا ہے ۔اس کارنامے پر جناب پرتوروہیلہ کو ،اونچا ہاتھ اٹھا کر خلوص دل سے سلام کرتا ہوں۔

           غالب پر جتنے قابل ذکر کام ہوئے ہیں پرتوؔ کے یہ تراجم، معیار ومقدار دونوں کے اعتبار سے نمایاں وروشن ہیں۔ فارسی خطوط غالب کے اردو تراجم سے انھوں نے اس بے بہا خزانے کے دروازے کوکھول دیا ہے جو گزشتہ ڈیڑھ سو سال سے مقفل پڑاتھا۔    (ڈاکٹر جمیل جالبی)