تفہیمِ غالب کے سلسلے میں کلام غالب کی شرحوں  نے بڑا اہم کردار ادا کیا ہے۔کلام غالب کی شرحیں لکھنے کا باقاعدہ سلسلہ انیسویں صدی کے آخر سے اب تک جاری ہے۔گزشتہ ایک صدی میں کئی ایسی شرحیں بھی لکھی گئیں جواب ناپید ہیں یارسالوں میں قسط وار شائع ہوئیں اوراب انھیں میں دفن ہیں۔ ایسی شرحوں میں سیماب اکبر آبادی   اورسید مقبول حسین احمد پوری کی شرحیں بطورخاص اہمیت رکھتی ہیں۔

سید مقبول حسین احمد پوری کانام 1925ء تا1945ء کے ادبی رسالوں میں مسلسل دیکھنے میں آتا ہے۔ اُن کی نظمیں ،گیت اور مضامین کثرت سے شائع ہوتے رہے ہیں۔ زیر نظر شرح کلام غالب ماہ نامہ ”ادبی دنیا“ لاہور میں جون 1931ء سے لے کر اکتوبر 1933ء تک بالاقساط شائع ہوئی۔ یہ شرح عام شرحوں سے قدرے مختلف ہے۔ افسوس کہ یہ نامکمل رہ گئی بہرحال جس حد تک لکھی گئی ،وہ بھی اپنی جگہ بڑی اہم ہے کہ اس سے قفہیمِ غالب کے بعض نئے پہلو سامنے آتے ہیں۔